Neni 8

Marrëdheniet e Urdhrit

Urdhri i Farmacistëve si institucion, gjatë kryerjes së detyrave mban lidhje, sipas përkatësisë, me  Ministrinë e Shëndetësisë, Ministrinë e Arsimit dhe të Shkencës, institucionet e tyre të vartësisë, me institucione të tjera  shtetërore, si dhe me institucione e organizma publike e jopublike, në nivel qendror e vendor.

Urdhri i Farmacistëve merr pjesë në hartimin e projektligjeve, të projektvendimeve dhe të dokumenteve të tjera të faramaceutikës shqiptare.

Marrëdhëniet me Institutin e Sigurimeve të Kujdesit Shëndetësor, si i vetmi blerës shërbimi, konkretizohen nëpërmjet hartimit të kontratave.

KREU I DYTË

Pjesa e parë

Anëtarësimi dhe rianëtarësimi

Neni 9

Anëtarësimi

Anëtarësimi në Urdhrin e Farmacistëve kërkon që farmacisti:

1.      Të jetë shtetas shqiptar. Për shtetasit e huaj zbatohet kërkesa e paragrafit 3, neni 6, të këtij statuti.

2.      Të ketë diplomën e farmacistit  të lëshuar nga Fakulteti i Mjekësisë i Universitetit të  Tiranës ose nga universitete të tjera të vendit të njohura nga Ministria  e Arsimit dhe e Shkencës, ose nga universitete jashtë shtetit, të njësuara nga institucioni përkatës në vendin tonë, i parashikuar me ligj, po kështu edhe për specializimet apo çertefikatat e marra jashtë shtetit.

3.      Në momentin e kërkesës për anëtarësim, të mos jetë  në ndjekje penale ose vuajtje të dënimit për çështje të papajtueshme me normat etiko-morale të profesionit dhe të Kodit të Deontologjisë Farmaceutike. Në rast se kandidati është në ndjekje penale, anëtarësimi i tij shqyrtohet pas vendimit te organit juridik që e ndjek.

4.      Të njohë dhe të zotohet me shkrim se do të zbatojë kërkesat e legjislacionit në fuqi dhe të Kodit të Deontologjisë Farmaceutike.

5.      Të paguajë rregullisht kuotizacionin e anëtarësisë.

6.      Farmacisti i huaj që ushtron profesionin në Shqipëri duhet edhe:

a)      Të jetë anëtar i organizmit relativ me UFSH-në në vendin e tij, ose ku ka ushtruar së fundi profesionin;

b)      Të rekomandohet me shkrim nga një anëtar shqiptar i Urdhrit të Farmacistëve.

c)      Të zotërojë paraprakisht, një minimum të fjalorit të shqipes.

Për ushtrimin e veprimtarisë farmaceutike private, të vendit apo të huaj, kërkohet vendimi i gjykates si person juridik ose fizik në mënyrë që farmacisti të lejohet të punojë.

Neni 10

Çertifikata e Anëtarësimit dhe dokumentet e kërkuara

Çertifikata e Anëtarësimit është individuale dhe jepet sipas kritereve të përcaktuara nga Këshilli Kombëtar i Urdhrit të Farmacistëve.

Me Çertifikatën  e Anëtarësimit pajiset çdo farmacist i  regjistruar në Urdhrin e Farmacistëve dhe çdo ndihmësfarmacist  i diplomuar në shkollat e mesme profesionale të njohura nga Ministria e Arsimit dhe e Shkencës dhe nga Ministria e Shëndetësisë, dhe i licensuar nga Ministria e Shëndetësisë ose i regjistruar pranë Qendrës Kombëtare të Kontrollit të Barnave para muajit maj të vitit 2006. Këta ndihmësfarmacistë duhet të jenë detyrimisht të regjistruar në regjistrin e posaçëm për ndihmësfarmacistët të Urdhrit të Farmacistëve.

Çertifikata e Anëtarësimit jepet për një periudhë pesë vjeçare. Kjo çertifikatë jepet në dy kopje ndër të cilat njëra dërgohet në Ministrinë e Shëndetësisë dhe tjetra qëndron e varur në farmaci.

I interesuari duhet të paraqesë këto dokumente:

1. Kërkesë për anëtarësim. Në kërkesë të thuhet shprehimisht se kërkuesi zotohet

të zbatojë Statutin e UFSH-së, Betimin e Hipokratit dhe Kodin Deontologjik Farmaceutik.

2. Vetëdeklarim  me shkrim, me anë të së cilit merr përsipër kryerjen me përgjegjësi dhe aftësi profesionale vetëm të specialitetit për të cilin është diplomuar dhe pagesën e rregullt të kuotës së anëtarësimit.

3. Fotokopje të noterizuar të  diplomës, të listës së notave, të dëshmive për tituj e grada shkencore dhe/ose dokumente për specializime, kualifikime e profilizime të kryera.

4. Katër copë fotografi 3 x 4 cm.

Neni 11

Rianëtarësimi

Farmacistët të cilët nuk e kanë ushtruar  profesionin e tyre për një periudhë mbi 5 vjet për arsye të ndryshme, që të regjistrohen a riregjistrohen për ushtrim profesioni, do t’i nënshtrohen një rikualifikimi dhe testimi. Programi dhe modalitetet përcaktohen bashkërisht nga organet përkatëse të Urdhrit me Fakultetin e Mjekësisë.

Neni 12

Mënyra e anëtarësimit

Anëtarësimi dhe rianëtarësimi në Urdhrin e Farmacistëve bëhet me vendim të posaçëm të Komisionit të Regjistrimit të Këshillit Rajonal. Vendimi është individual. Për sa kohë që Komisioni i Regjistrimit nuk është krijuar, anëtarësimi bëhet nga presidenti dhe sekretari rajonal. Vendimi për anëtarësim bëhet brenda një muaji nga dorëzimi i kërkesës.

Këshilli Rajonal, në çdo mbledhje të tij, ratifikon anëtarësimet e reja. Nga ky moment kërkuesi regjistrohet në regjistrin  e Urdhrit dhe pajiset me kartën e anëtarësisë.

Neni 13

Pagesa për anëtarësim

Për veprimet e kryera për anëtarësim e regjistrim, kërkuesi paguan tarifën, e cila përcaktohet me vendim të Këshillit Kombëtar të Urdhrit. Për subjektet private të vendit dhe ato të huaja, Këshilli Kombëtar vendos tarifa të veçanta, që derdhen në arkën e këtij Këshilli.

Neni 14

Ankimi për refuzimin e anëtarësimit

Ndaj vendimit që refuzon kërkesën për anëtarësim e regjistrim, kërkuesi ka të drejtë të ankohet pranë Këshillit Kombëtar jo më vonë se 30 ditë nga dita e shpalljes dhe e marrjes së njoftimit për vendimin. Komisioni apo organi  përkatës i Këshillit Kombëtar e shqyrton atë jo më vonë se 2 muaj nga paraqitja e ankesës.

Ky vendim është i formës së prerë.

Kërkuesi ka të drejtë t’i drejtohet rajonit përsëri me kërkesë vetëm  6 muaj pas përgjigjes negative të Këshillit Kombëtar dhe vetëm nëse ka plotësuar kushtet penguese, që i lejojnë pranimin.

Neni 15

Farmacistët në pension

Farmacistët pensionistë që nuk ushtrojnë profesionin, njihen si anëtarë të Urdhrit pa qënë të detyruar të paguajnë kuotizacionin e anëtarësisë. Kur ata punësohen ose vetëpunësohen, detyrohen të paguajnë edhe kuotizacionin e Urdhrit. Farmacistët që nuk ushtrojnë profesionin, sepse vuajnë nga një sëmundje invalidizuese që nuk pajtohet me kushtet e kërkuara nga ky  profesion dhe/ose i bën të rrezikshëm për popullatën, mbeten anëtarë të Urdhrit si pensionistët.

Neni 16

Ndërprerja e anëtarësimit

Anëtarësimi në Urdhër pushon së qëni në këto raste:

1.       Me vdekjen e anëtarit.

2.       Kur anëtarit i hiqet e drejta e ushtrimit të profesionit me vendim disiplinor të formës së prerë nga organet e Urdhrit apo Gjykatës.

3.       Kur farmacistët janë duke vuajtur dënimin penal me heqje të lirisë për krime që bien ndesh me profesionin. Vendimi për çregjistrim i komunikohet zyrtarisht personit, institucionit ku ka shërbyer dhe, kur gjykohet me vend, iu bëhet e ditur të gjithë farmacistëve dhe institucioneve të tjera shëndetësore me anë të një qarkoreje.

Anëtarësimi nuk pushon kur anëtari kryen kurse kualifikimi apo specializimi brenda dhe jashtë shtetit, duke marrë paraprakisht miratimin e UFSH-së.

Neni 17

Leja e ushtrimit të profesionit

Leja e ushtrimit të profesionit është individuale dhe jepet sipas kritereve të përcaktuara nga Këshilli Kombëtar i Urdhrit të Farmacistëve.

Me lejen e ushtrimit të profesionit pajiset çdo farmacist i  regjistruar në Urdhrin e Farmacistëve dhe çdo ndihmësfarmacist  i diplomuar në shkollat e mesme profesionale të njohura nga Ministria e Arsimit dhe e Shkencës dhe nga Ministria e Shëndetësisë, dhe i licensuar nga Ministria e Shëndetësisë ose i regjistruar pranë Qendrës Kombëtare të Kontrollit të Barnave para muajit maj të vitit 2006. Këta ndihmësfarmacistë duhet të jenë detyrimisht të regjistruar në regjistrin e posaçëm për ndihmësfarmacistët të Urdhrit të Farmacistëve.

Leja e ushtrimit të profesionit jepet për një periudhë pesë vjeçare dhe rinovimi i saj bëhet mbi bazën e kualifikimeve dhe testimit professional. Komisioni i testimit profesional zgjidhet nga Këshilli Kombëtar i Urdhrit të farmacistëve.

Neni 18

Kriteret për dhënien e Lejes së ushtrimit të profesionit

1.      Për farmacistët

a)      Vetëdeklarim

b)      Fotokopje e diplomës

c)      2 copë fotografi 3 x 4 cm

Për farmacistët drejtues teknik kërkohet dhe një fotokopje e licensës së Ministrisë së Shëndetësisë.

2.                  Ndihmësfarmacistët

a)      Vetëdeklarim

b)      Fotokopje e diplomës së shkollës së mesme profesionale

c)      2 copë fotografi 3 x 4 cm

Për ndihmësfarmacistët drejtues teknik në agjenci farmaceutike kërkohet dhe një fotokopje e licensës së Ministrisë së Shëndetësisë.

Pjesa e dytë

Të drejtat dhe detyrat e anëtarëve

Neni 19

Të drejtat

Anëtari i Urdhrit të Farmacistëve ka të drejtë:

1.       Të ushtrojë profesionin në specialitetin e vet në përputhje me legjislacionin në fuqi, me normat e etikës  dhe Kodit të Deontologjisë Farmaceutike.

2.       Të kërkojë mbrojtje nga Urdhri i Farmacistëve për shkeljen e të drejtave të tij profesionale dhe të Kodit Deontologjik  nga cilido qoftë.

3.       Të zgjedhë dhe të zgjidhet në organet e Urdhrit.

4.       Të marrë pjesë në shqyrtimin nga organizmat e Urdhrit për probleme që kanë të bëjnë me të.

5.       Të apelojë vendime të Urdhrit, kur gjykon se ato janë të padrejta.

Neni 20

Detyrat

Anëtari i Urdhrit të Farmacistëve  ka detyrë:

1.       Të respektojë normat, ligjet dhe rregullat në fuqi në lidhje me ushtrimin e profesionit sipas kerkesave të shkencave farmaceutike e mjekësore, të normave të Etikës dhe të Kodit të Deontologjisë Farmaceutike.

2.       Të punojë vazhdimisht për rritjen e standarteve të tij profesionale dhe në përputhje me të gjitha normat, të kërkojë të zbatohen arritjet bashkëkohore në ushtrimin e profesionit të farmacistit prej tij dhe kolegëve të vet.

3.       Të shlyejë në çdo kohë kuotizacionin e anëtarit dhe çdo detyrim tjetër financiar ndaj Urdhrit.

4.       Të zbatojë të gjitha vendimet e marra nga Këshilli Kombëtar për probleme të paparashikuara dhe që janë bërë shqetësim i shumicës së farmacistëve.

Në rast shkeljeje të këtyre vendimeve, është i detyruar t’u nënshtrohet masave disiplinore të përshkallëzuara, sipas rregullores së disiplinës.

5.       Të ketë në vendin e tij të punës literarurën themelore farmaceutike, në bazë të listës së dërguar nga UFSH-ja, revistën “Farmacisti”, në të cilën është i detyruar të abonohet, aktet ligjore e normative që rregullojnë ecurinë normale të punës në farmaci, si dhe çdo dokument që vjen ose botohet nga USHF-ja, Ministria e Shëndetësisë dhe institucionet me të cilat ka lidhje.

KREU I TRETË

ORGANIZIMI DHE DREJTIMI

Pjesa e parë

Organet e Urdhrit

Neni 21

Organet

Organet kryesore të Urdhrit të Farmacistëve janë:

a)      Asambletë e Urdhrit.

b)      Këshillat e Urdhrit.

c)      Komisionet Disiplinore.

d)      Komisioni Kombëtar i Regjistrimit dhe i dhënies të së drejtës të Ushtrimit të Profesionit.

e)      Komisione apo grupe pune të përhershme ose të përkohshme të ngritura me vendim të Këshillit Kombëtar në përputhje me nevojat e Urdhrit në dinamikë.

Neni 22

Asmbletë dhe këshillat

Asambleja e Përgjithshme përbëhet nga tërësia e anëtarëve të Këshillave Rajonale.

Asambleja e Përgjithshme zgjedh Presidentin dhe zëvendësin e tij me një mandat 4-vjeçar, me të drejtë rizgjedhje.

Asambleja e Përgjithshme zgjedh Këshillin Kombëtar. Zgjedhjet për Këshillin Kombëtar bëhen çdo 4 vjet, me të drejtë rizgjedhjeje.

Mbledhja e Asamblesë thirret nga Presidenti si dhe kur kërkohet nga 2/3 e anëtarëve të Këshillit Kombëtar.

Asambleja Rajonale përbëhet nga tërësia e anëtarëve të Urdhrit të Rajonit (qarkut). Asambleja Rajonale zgjedh Këshillin Rajonal, Zgjedhjet e Këshillit Rajonal bëhen çdo 4 vjet, me të drejtë rizgjedhjeje. Këshilli zgjedh Presidentin dhe zëvendësin e tij. Asambleja thirret nga presidenti i Këshillit Rajonal dhe, në raste të jashtëzakonshme, me kerkesën e 2/3 të anëtarëve të Këshillit Rajonal. Në këto raste mbledhja bëhet pasi merret paraprakisht miratimi i Presidentit të Këshillit Kombëtar.

Asambleja thirret drejtpërdrejt nga Presidenti i Këshillit Kombëtar kur vendoset në Këshillin Kmbëtar.

Neni 23

Këshilli Kombëtar dhe drejtimi i tij

Këshilli Kombëtar përbëhet nga:

1.Anëtarë të zgjedhur nga Asambleja; Presidenti i Urdhrit të Farmacistëve, zëvendësi i tij dhe presidentët e Këshillave Rajonale.

2.Nga një përfaqësues nga Ministria e Shëndetësisë, Instituti i Sigurimeve Shëndetësore dhe Fakulteti i Mjekësisë, me të drejtë vote këshillimore.

3.Anëtarë të kooptuar nga vetë Këshilli për zëvendësim levizjesh të mundëshme të anëtarëve të Këshillit Kombëtar.

Për mbarëvajtjen e Urdhrit në përmbushjen e misionit dhe të funksionneve të tij, në Këshill mund të zgjidhen edhe përfaqësues nga publiku me të drejtë vote këshillimore.

Rastet e shkarkimit të anëtarëve të Këshillit Kombëtar parashikohen  në nenin 29 të këtij statuti.

Ky këshill emëron dhe shkarkon Sekretarin e Përgjithshëm.

Këshilli Kombëtar mblidhet jo më pak se 4 herë në vit. Këshilli thirret nga Presidenti, zëvendësi i tij kur ai mungon, si dhe me kërkesën e 1/3 së anëtarëve me votë vendimore.

Për të organizuar dhe drejtuar veprimtarinë e Këshillit Kombëtar dhe të gjitha strukturave të tjera të Urdhrit, pranë Këshillit Kombëtar funksionon Aparati Qendror Ekzekutiv dhe Bordi Drejtues i tij.

Këshilli Kombëtar merr vendime, me shumicë votash, kur janë të pranishëm më shumë se gjysma e anëtarëve të tij.

Neni 24

Detyrat e Këshillit Kombëtar

Harton dhe miraton Kodin e Deontologjisë Farmaceutike dhe organizon mbikëqyrjen dhe zbatimin e tij.

Këshilli Kombëtar udhëheq të gjithë veprimtarinë e Urdhrit të Farmacistëve. Për përmbushjen e misionit të tij, përveç detyrave të specifikuara në nene të veçanta të këtij Statuti, Këshilli:

1.       Harton dhe miraton Statutin, strategjitë e zhvillimit të Urdhrit, rregulloret e funksionimit të këshillave dhe organizmave vartëse.

2.       Harton dhe miraton Kodin e Deontologjisë Farmaceutike dhe organizon mbikëqyrjen dhe zbatimin e tij.

3.       Përcakton dhe miraton strukturën organizative të Këshillit Kombëtar dhe  të Këshillave Rajonale.

4.       Cakton kuotizacionin, tarifën e regjistrimit dhe çdo lloj tarife tjeter që lidhet me funksionimin e këtij organi.

5.       Miraton buxhetin dhe administrimin e pasurive të luajtshme e të paluajtshme te Urdhrit të Farmacistëve në nivel kombëtar dhe rajonal.

6.       Mbikëqyr të gjitha veprimtaritë dhe administrimin e organeve që varen prej tij.

7.       Miraton veprimtarinë kombëtare  kryesore për njohjen dhe ndërgjegjësimin e të gjithë farmacistëve me aktet normative, misionin, synimet, funksionet dhe detyrat e Urdhrit.

8.       Mbikëqyr dhe ndërhyn në rregullimin e marrëdhënieve të punës së farmacistëve dhe të subjekteve të tyre private me Ministrinë e Shëndetësisë, Qendrën Kombëtare të Kontrollit të Barnave, Institutin e Sigurimeve të Kujdesit Shëndetësor dhe Drejtorinë Rajonale e Sigurimeve të Kujdesit Shëndetësor.

9.       Nëpërmjet ndërgjegjësimit të të gjithë anëtarëve te vet ndërgjegjëson dhe informon opinionin publik për misionin dhe funksionet e Urdhrit, si dhe deklaron pozicionet e tij  për probleme dhe situata të veçanta farmaceutike me interes publik.

Me anë të strukturave të tij të zgjedhura apo të emëruara të Aparatit Qendror Ekzekutiv:

10.   Miraton pagat, kuotizacionet, kuotat e honorareve, tarifat e regjistrimit, të licensimit dhe rilicensimit profesional, si dhe tarifa të tjera që lidhen me funksionimin e tij.

11.   Organizon dhe mbikëqyr procesin e regjistrimit dhe mban të azhornuar Regjistrin e Farmacistëve në nivel kombëtar.

12.   Organizon dhe mbikëqyr veprimtaritë për licensimin profesional periodik të farmacistëve;

13.   Koordinon bashkëpunimin dhe bashkëveprimin e nevojshëm me organizmat përkatëse për ruajtjen e standarteve të larta në përgatitjen  e farmacistëve, në përzgjedhjen dhe specializimin e tyre, në ushtrimin e profesionit, si dhe për kualifikimin e vazhdueshëm profesional të tyre.

14.   Zgjedh, sipas kritereve më të specifikuara, Komisionin Disiplinor Kombëtar dhe komisionet apo grupet e tjera të punës me karakter kombëtar të përhershëm dhe kontrollon periodikisht veprimtarinë e tyre.

15.   Me strukturat e tij organizon sipas përkatësive dhe specifikave të veçanta bashkëpunimin me organizata të ndryshme qeveritare dhe joqeveritare të vendit dhe të huaja.

16.   Organizon kualifikimin e veçantë për anëtarët dhe pjestarët e srukturave të Urdhrit si dhe botimet e nevojshme.

17.   Bën propozime për projektligje dhe projektvendime, që i konsideron të domosdoshme për përmirësimin e standarteve.

18.   Bën propozime për dekorime dhe vendos për vlerësime të ndryshme etj.

19.   Mban marrëdhënie me organizma analoge të huaja dhe ratifikon marrëveshje dhe protokolle bashkëpunumi.

Neni 25

Bordi Drejtues i Aparatit Qendror Ekzekutiv

Bordi Drejtues drejtohet nga Presidenti i Këshillit Kombëtar dhe përbëhet nga Sekretari i Përgjithshëm, shefi i sektorit ekonomiko – financiar, juristi dhe farmacisti.

Ai është organ ekzekutiv, i cili organizon, kontrollon e mbikëqyr zbatimin e vendimeve të Asamblesë së Përgjithshme, Këshillit Kombëtar dhe të urdhëresave dhe udhëzimeve të Presidendit të Këshillit Kombëtar. Me anë të komisioneve, grupeve të veçanta të punës dhe konsultave të specializuara të aparatit, ai mbikëqyr e kujdeset për zbatimin me përpikmëri të Ligjit, Statutit e rregulloreve në të gjitha strukturat e Urdhrit.

Bordi Drejtues:

1.       Organizon, drejton dhe kontrollon veprimtaritë e aparatit qendror të Urdhrit;

2.       Harton dhe i paraqit për miratim Këshillit Kombëtar:

·         Objektiva dhe strategji për zhvillimin e UFSH-së, si dhe projektvendime dhe çështje të tjera për shqyrtim.

·         Bilancin e veprimtarisë ekonomiko-financiare të Urdhrit;

·         Projektbuxhetin e vitit financiar pasardhës,  të ndarë sipas zërave dhe për çdo rajon.

·         Projektrregullore për veprimtarinë e strukturave dhe të organeve të Urdhrit.

3.       Përcakton deklarimin e pozicioneve të Urdhrit për probleme të veçanta me interes publik.

4.       Mbikëqyr, kontrollon, analizon dhe ndihmon veprimtaritë e këshillave rajonale dhe strukturave të tjera të Urdhrit.

Neni 26

Presidenti i Këshillit Kombëtar

Presidenti i Këshillit Kombëtar zgjidhet dhe shkarkohet me votim të fshehtë nga Asambleja e Përgjithshme. Për zgjedhjen e Presidentit paraqiten për votim 2 ose më shumë kandidatura sipas kritereve të përcaktuara në nenin 28 të Statutit.

Presidenti i Këshillit Kombëtar ka këto detyra e kompetenca:

1.       Udhëheq dhe mbikëqyr të gjithë veprimtaritë e Urdhrit.

2.       Nxjerr urdhëresa e udhezime për mbarëvajtjen e punës.

3.       Miraton propozimet e Bordit Drejtues.

4.       Thërret mbledhjet e Asamblesë së Përgjithshme, të Këshillit Kombëtar dhe të Bordit Drejtues.

5.       Kërkon sipas rastit mbledhjet e asambleve apo këshillave rajonale.

6.       Përfaqëson Këshillin Kombëtar në marrëdhënie me organe dhe organizma qeveritare dhe jo qeveritare brenda dhe jashtë vendit. Sipas rastit ia delegon këto kompetenca zëvendësit ose Sekretarit të Përgjithshëm.

7.       Ndërmerr nisma propozimi në organe ligjvënëse e vendim-marrëse për dokumente të rëndësishme për farmaceutikën shqiptare në bashkëpunim me autoritet përkatëse.

8.       Propozon në stukturat e Urdhrit sipas përkatësisë dhe rëndësisë së problemit, kandidatura për t’u zgjedhur, kooptuar ose shkarkuar në organet e Urdhrit si dhe për dekorime, vlerësime, shpërblime, ndihma etj.

9.       I autorizon të drejtën e nënshkrimit për Urdhrin, zëvendësit të tij dhe në raste të veçanta Sekretarit të Përgjithdhëm.

10.   Vetë dhe me propozim të Bordit drejtues, emëron dhe shkarkon punonjësit e aparatit që nuk janë të zgjedhur.

Neni 27

Sekretari i Përgjithshëm

Sekretari i Përgjithshëm është përgjegjësi kryesor për problemet tekniko-organizative të Këshillit Kombëtar dhe të Aparatit të tij. Ai duhet të jetë farmacist.

Sekretari i Përgjithshëm permbush këto detyra:

1.       Kujdeset për krijimin, organizimin e drejtimin e komisioneve e grupeve të punës dhe kontrollon veprimtarinë e tyre, ose, sipas rastit edhe i kyeson ato. Në mënyrë të veçantë kujdeset për hartimin e projektit të Kodit të Etikës dhe Deontologjisë Farmaceutike, si dhe të të gjitha rregulloreve të tjera për veprimtaritë e organeve të Këshillave të Urdhrit dhe të aparatit qendror.

2.       Mban kontakte me këshillat rajonale dhe koordinon veprimtarinë e tyre.

3.       Përgatit dokumentacionin për mbledhjet e Këshillit Kombëtar, të Bordit Drejtues dhe të komisioneve e grupeve të punës.

4.       Mban kontakte me organizmat qeveritare dhe jo qeveritare të vendit dhe të huaja.

5.       Raporton dhe informon sistematikisht Presidentin dhe Këshillin Kombëtar.

Neni 28

Këshillat  Rajonale

Këshillat Rajonale krijohen sipas ndarjes administrato-territoriale në bazë Prefekture (Qarku).

Këshilli Rajonal përbëhët nga:

1.       3-5 anëtarë të zgjedhur nga Asambleja Rajonale me votim të fshehtë mbi kanditatura alternative, sipas kritereve të parashikuara në nenin 28. Këshilli Kombëtar i Tiranës përbëhet nga 19 anëtarë.

2.       Një farmacist nga Drejtoria Rajonale e Sigurimeve të Kujdesit Shëndetësor. Ky ka të drejtë vote këshillimore.

3.       Anëtarë të kooptuar nga vetë këshilli për zëvendësim lëvzjesh të mundshme të Këshillit  Rajonal.

Për mbarëvajtjen  e Urdhrit në përmbushjen e misionit dhe funksioneve të tij, në këshill mund të zgjidhen përfaqësues nga publiku, me të drejtë vote këshillimore.

Këshilli Rajonal zgjedh presidentin dhe zëvendësin e tij. Mandati i presidentit është 4 vjeçar, me të drejtën e një rizgjedhjeje. Këshilli Rajonal emëron dhe shkarkon sekretarin e tij, i cili mund të jëtë  farmacist, jurist ose ekonomist.

Për të përmbushur funksionet dhe detyrat e tij Këshilli Rajonal:

1.       Krijon dhe mban të azhurnuar regjistrin e farmacistëve, si dhe pasqyron licensimin dhe rilicensimin profesional të farmacistëve në juridiksionin e vet dhe të shërbimeve farmaceutike private të vendit dhe të huaja, të hapura në rajonet përkatëse.

2.       Siguron zbatimin e vendimeve dhe udhëzimeve të  Këshillit Kombëtar dhe të detyrave të ngarkuara nga Presidenti.

3.       Kryen veprimtaritë për njohjen dhe ndërgjegjësimin e farmacistëve të juridiksionit të tij me aktet normative, misionin, synimet, funksionet dhe detyrat e Urdhrit.

4.       Analizon periodikisht veprimtaritë e Urdhrit dhe organizmave të tij në rajon.

5.       Zgjedh Komisionin Disiplinor në bazë të kritereve të posaçme, si dhe komisione dhe grupe të tjera pune.

6.       Ndërgjegjëson dhe informon publikun e juridiksionit për funksionin dhe kompetencat e Urdhrit, me veprimtari të drejtpërdrejta me kontigjente të publikut ose nëpërmjet mediave.

7.       Përfaqëson dhe mbron interesat e përbashkëta legjitime të profesionit të farmacistëve dhe deklaron publikisht opinionet e tij për ngjarje e situata të veçanta farmaceutike e mjekësore  në rajon.

8.       Organizon punën në juridiksion për mbledhjen e kuotizacioneve dhe të detyrimeve të tjera të anëtarëve.

9.       Organizon bashkëpunimin me organizmat qeveritare dhe joqeveritare brenda rajonit, vendit dhe jashtë tyre.

10.   I propozon Këshillit ose Presidentit të Këshillit Kombëtar për probleme e nisma, që i quan të domosdoshme për të rritur standartet e shërbimit në rajonin e vet ose më gjerë.

11.   Merr pjesë në organizimin dhe zhvillimin e veprimtarive studimore, shkencore dhe kualifikuese të farmacistëve të rajonit ose më gjerë.

12.   I propozon Këshillit ose Presidentit të Këshillit Kombëtar për dekorime, vlerësime, shpërblime, si dhe për ndihma në raste fatkeqësish për anëtarët e Urdhrit në juridiksion.

Neni 29

Thirrja e Keshillave Rajonale

Këshilli Rajonal thirret në mbledhjen e tij nga Presidenti ose, në mungesë të tij, nga zëvëndëspresidenti.

Mbledhjet e Këshillit duhet të  bëhen jo më pak se 4 herë në vit. Kur gjykohet e nevojshme, thirret mbledhja e jashtëzakonshme e Këshillit, por vetëm me miratim nga Presidenti i Këshillit Kombëtar.

Neni 30

Kriteret për zgjedhjen e anëtarëve të Këshillit Kombëtar ose të Këshillave Rajonale.

Kandidaturat për anëtarë të Këshillit Kombëtar dhe të Këshillave Rajonale zgjidhen ndër farmacistët më të dalluar për përkushtimin, aftësitë dhe autoritet profesional.Përzgjedhja bëhet duke u orientuar nga këto kritere kryesore:

1.       Të jetë shtetas shqiptar.

2.       Të ketë mbushur moshën 25 vjeç.

3.       Të ketë mbi 2 vjet i regjistruar në Urdhrin e Farmacistëve.

4.       Të ketë reputacion etiko-moral dhe prestigj profesional.

5.       Të ketë shfaqur korrektësi në zbatimin e normave, ligjeve dhe rregullave të jetës shoqërore, si dhe në komunikimin me publikun, pacientët, kolegët dhe me drejtuesit.

6.       Mundësisht të jetë aktivizuar në veprimtari studimore dhe kualifikuese, publikuese farmaceutike dhe shëndetësore.

7.       Mundësisht të ketë grada e tituj  shkencorë ose veprimtari pedagogjike.

8.       Të mos ketë kryer vepra penale si dhe, gjatë 3 vjetëve të fundit, të mos jetë ndëshkuar për shkelje të ushtrimit të profesionit.

9.       Të mos jetë i zgjedhur apo i emëruar në detyra funksionale drejtuese shtetërore.

Mënyrat e përzgjedhjes përcaktohen edhe në rregulloren e Këshillave të Urdhrit.

Neni 31

Largimi i parakohshëm nga Këshilli

Anëtari i Këshillit Kombëtar dhe atij Rajonal largohet para kohe nga këshilli kur:

1.       Kërkon vetë dorëheqjen.

2.       Dënohet me vendim të formës së prerë për vepra penale apo për shkelje në ushtrim të profesionit ose shkelje administrativo-disiplinore.

3.       Shpërdoron detyrën.

4.       Mungon tri herë radhazi në mbledhje të Këshillit pa shkaqe të arsyetuara.

5.       Paaftësohet për arsye shëndetësore.

6.       Paraqit paaftësi në kryerje të detyrave.

7.       Emërohet apo zgjidhet në detyra drejtuese shtetërore apo partiake që bien ndesh me kriteret e parashikuara në nenin 28 të këtij Statuti.

Neni 32

Propozimi dhe vendimmarrja për largimin e parakohshëm

Përveç pikes 1 të nenit 29, për të gjitha pikat e tjera, propozimin kanë të drejtë t’ia paraqesin Këshillit përkatës:

a)   Për anëtarët e Këshillave Rajonale:

1.  Së paku ¼ e Asamblesë Rajonale.

2.  1/3 e anëtarëve të këtij Këshilli.

3.  Presidenti i Këshillit përkatës.

b)  Për presidentët e këshillave rajonale:

1.       Së paku 1/3 e asamblesë rajonale.

2.       1/3 e anëtarëve të këshillit përkatës.

3.       Presidenti i Këshillit Kombëtar.

c)  Për anëtarët e Këshillit Kombëtar:

1.   Së paku 1/3 e Asamblesë së Përgjithshme.

2.   1/3 e anëtarëve të Këshillit Kombëtar.

3.   Presidenti i Këshillit Kombëtar.

d)  Për Presidentin e Këshillit Kombëtar:

1.   Së paku 1/3 e Asamblesë së Përgjithshme;

2.   2/3  e anëtarëve të Këshillit Kombëtar.

Në të gjitha rastet, përveç pikës 7, neni 29, vendimi merret me së paku 2/3 e votave vendimore të anëtarëve të pranishëm.Në të gjitha rastet votimi bëhet i fshehtë me përjashtim të rasteve kur vetë Këshilli perkatës vendos të kundërtën. Për rastet që i përkasin pikës 7, neni 29, largimi është i detyrueshëm dhe nuk votohet.

Neni 33

Njoftimi për mbledhjet

Presidenti i Këshillit Kombëtar apo Rajonal vendos për datën, kohën dhe rendin e ditës së çdo mbledhjeje. Mbledhja  e Këshillit Kombëtar apo Rajonal njoftohet me shkrim 7 deri më 14 ditë përpara, duke bërë të ditur edhe rendin e ditës.

Kriteret e mësipërme mund të mos zbatohen vetëm në raste e rrethana të veçanta. Në çdo mbledhje të tillë duhet të jenë të pranishëm më shumë se gjysma e anëtarëve me të drejtë vote vendimore, të cilët, paraprakisht, miratojnë zhvillimin e mbledhjes.

Neni 34

Marrja e vendimeve

Këshilli Kombëtar apo rajonal merr vendim vetëm për çështje të cilat janë përfshirë në rendin e ditës së mbledhjes, përveç rasteve ku të paktën 2/3 e anëtarëve, me votë vendimore, janë dakord për shqyrtimin dhe marrjen e vendimeve edhe për çështje që nuk janë në rendin e ditës.

Neni 35

Vlefshmëria e mbledhjes

Mbledhja  e Këshillit Kombëtar apo rajonal është e vlefshme kur janë të pranishëm të paktën 2/3 e anëtarëve me të drejtë vote vendimore. Kur në hapjen e mbledhjes kjo shumicë nuk arrihet, atëherë, Presidenti apo zëvendësi që drejton mbledhjen, vendos thirrjen e mbledhjes një ditë tjetër, duke përsëritur njoftimin me shkrim. Në këtë rast mbledhja është e vlefshme në qoftë se janë të pranishëm së paku gjysma e anëtarëve me të drejtë vote vendimore.

Neni 36

Procesverbali i mbledhjes

Në çdo mbledhje mbahet një procesverbal ku shkruhen data, vëndi i mbledhjes, pjesëmarrësit, çështjet që u diskutuan, vendimet që u morrën si dhe forma e rezultati i votimit.

Presidenti i Këshillit Rajonal cakton një person për mbajtjen e procesverbalit, ndërsa për Këshillin Kombëtar , Presidenti cakton një sekretari me dy persona.

Në mbarim të mbledhjes, procesverbali nënshkruhet nga mbajtësi dhe Presidenti i Këshillit ose drejtuesi i mbledhjes.

Neni 37

Forma e votimit

1)    Vendimet merren me votime të hapura, përveç rasteve kur për arsye e rrethana të veçanta

vendoset ndryshe.

2)    vendimet që përmbajnë vlerësime mbi sjelljen ose cilësitë e një individi merren vetëm

me votim të fshehte.

Neni 38

Vlefshmëria e votës për të marrë vendime

Vendimet merren me shumicën e votave të anëtarëve që marrin pjesë në mbledhje dhe kanë të drejtën e votës vendimore, përveç rasteve  kur kërkohet një shumicë e cilësuar. Kur kjo e fundit nuk arrihet, atëherë kryhet një votim i dytë. Nëse edhe në votimin e dytë persëritet e njëjta situatë, atëherë vendimi shtyhet për t’u marrë në një mbledhje tjetër, në të cilën është e mjaftueshme një shumicë e thjeshtë votash.

Në rast se votat barazohen dhe votimi nuk ka qënë i fshehtë, vota e presidentit është vendimtare.

Pjesa e dytë

Komisionet e Urdhrit

Neni 39

Komisionet Disiplinore

Pranë Këshillit Kombëtar dhe Këshillave Rajonale të Urdhrit të Farmacistëve funksionojnë komisionet disiplinore të cilat caktohen nga Këshillat përkatës.

Komisionet disiplinore janë organizma të gjykimit profesional të pavarur disiplinor.

Ato verifikojnë dhe shqyrtojnë ankesat dhe kërkesat për shkelje nga anëtarët e Urdhrit, të Etikës Farmaceutike, të Kodit Deontologjik, si dhe për kequshtrim profesioni dhe gabime profesionale. Komisionet i disiplinore pranë Këshillave Rajonale ushtrojnë kompetenca disiplinore të shkallës së parë. Vendimet e tyre mund të apelohen në Komisionin Disiplinor të Këshillit Kombëtar, i cili ushtron kompetenca disiplinore te shkallës së dytë dhe përfundimtare.

Këto komisione disiplinore funksionojnë në bazë të rregullores së posaçme (për komisionet disiplinore) të miratuara nga Këshilli Kombëtar.

Neni 40

Anëtarët e Komisionit Disiplinor

Në përbërje të komisioneve disiplinore rajonale zgjidhen 5 vetë, ndërsa në atë kombëtar 7 vetë. Për të siguruar zhvillimin e një gjykimi profesional e të pavarur, të drejtë, e të ndershëm, të paanshëm  dhe me kompetencë , përzgjedhja e anëtarëve të komisioneve disiplinore bëhet vetëm mbi bazën e kërkesave të larta cilësore dhe kritereve individuale më të specifikuara, të cilat janë të përshkruara më hollësishëm në rregulloren për komisionet disiplinore.

Neni 41

Kompetencat ndëshkimore

Komisioni disiplinor heton dhe gjykon në bazë të fakteve dhe provave të administruara në sencë dëgjimore. Kur vërtetohet se anëtari ka kryer shkelje ai jep këto masa :

a)          Vërejtje me shkrim.

b)          Vërejtje me paralajmërim.

c)          Gjobë  nga 10 000 deri në 200.000 lekë.

d)          Propozim për shkarkim nga funksione drejtuese.

e)          Pezullim nga e drejta e zgjedhjes në organet drejtuese të Urdhrit të   Farmacistëve      deri    në 3 vjet.

f)           Përjashtim i përkohshëm nga urdhri  për një periudhë deri në 3 vjet.

Masa ndëshkuese e parashikuar në shkronjën “f “ sjell si rrjedhojë çregjistrimin nga Regjistri i Farmacistëve te Rajonit dhe ai Kombëtar për afatin e caktuar në vendimin disiplinor, që i heq anëtarit në fjalë për aq kohë të drejtën e ushtrimit të profesionit.

Masat e mësipërme disiplinore mund të shlyhen, në qoftë se brenda një viti nga dita e dhenies së tyre për  shkronjat “a” dhe “b” të këtij neni, dhe brenda tre vjetësh për shkronjat “d”, “e” dhe “f”, ndaj anëtarit nuk është marrë ndonjë masë tjetër disiplinore.

Neni 42

Detyrimi për kualifikim profesional

Përveç masave ndëshkuese për ruajtjen e standarteve të larta në ushtrimin e profesionit, komisionet disiplinore kurdoherë vendosin edhe detyrime me afate të përcaktuara, sipas veçorive të çdo rasti, për kualifikimin e nevojshem profesional dhe të studimeve plotësuese me provimet përkatëse. Këto detyrime për zbatim bashkërendohen, mbikëqyren dhe testohen së bashku nga komisionet e Urdhrit të Farmacistëve me departamentin e farmacisë të universiteteve shtetërore, duke përballuar shpenzimet përkatëse nga anëtari i ndëshkuar për thyerje të disiplinës.

Neni 43

Shpenzimet për proceset disiplinore

Për  çdo ditë vonesë deri në 30 ditë pas mbarimit të afatit kohor, për çdo gjobë shtohet vlera në masën 1 për qind. Nëse  anëtari i ndëshkuar nuk e shlyen këtë detyrim, atij i hiqet menjëhere e drejta individuale e ushtrimit të profesionit qoftë në institucion publik, privat apo  si i vetëpunësuar.

Të gjitha shpenzimet që detyrohet të bëjë UF-ja për verifikime etj, për çdo proces disiplinor, fillimisht përballohen nga vetë UF-ja. Kur vendimi i gjykimit profesional merr formë të prerë, në bazë të situacionit përfundimtar të shpenzimeve, bëhet rimbursimi i vlerës së plotë të tyre nga anëtari i ndëshkuar ose nga personi tjetër i caktuar në vendimin përkatës disiplinor brenda 90 ditësh.

Për çdo ditë vonesë deri në 30 ditë pas mbarimit të këtij afati kohor, aplikohet 1 për qind e vlerës, si më sipër.

Nëse anëtari i ndëshkuar nuk e shlyen këtë detyrim, atij i hiqet e drejta idividuale e ushtrimit të profesionit qoftë në institucion publik, privat apo si i vetëpunësuar.

Neni 44

Ankimi për vendimet disiplinore

Ankimi kundër vendimeve për marrjen e masave disiplinore ndëshkimore, paraqitet në komisionin disiplinor të Këshillit Kombëtar të Urdhrit të Farmacistëve, brënda 30 ditëve nga komunikimi me shkrim i vendimit.

Komisioni Disiplinor i Këshillit Kombëtar, brënda 30 ditëve nga koha e marrjes së ankesës, detyrohet të japë vendimin për ankesën e paraqitur. Vendimi i Komisionit Disiplinor të Këshillit Kombëtar është i formës së prerë.

Për masat disiplinore “c” dhe “f” të nenit 39 të këtij Statuti, personi ka të drejtë t’i drejtohet gjykatës.

Neni 45

Komisione të tjera dhe grupe pune (ad-hoc)

Pranë Këshillit Kombëtar dhe këshillave rajonale, për të përmbushur funksionet e detyrat që parashikon neni 2 i Ligjit nr. 9150, datë 30.10.2003 “Për Urdhrin e Farmacistëve në Republikën e Shqipërisë”, në vartësi të detyrave dhe problemeve që duhen zgjidhur, në dinamikë dhe, sipas rastit, krijohen komisione apo grupe pune të përhershme apo të përkohshme për:

1.  Regjistrimin e anëtarëve  dhe azhurnimin e Regjistrit të Urdhrit të Farmacictëve,

2.  Dhënien e lejes së ushtrimit profesional dhe testimin profesional.

3.  Standartet, arsimimin dhe kualifikimin.

4.  Marrëdhëniet publike dhe me jashtë.

5.  Planifikimin dhe kontrollin ekonomiko-financiar.

6.  Nxjerrjen e organit periodik dhe botime të tjera.

Veprimtaria  e këtyre komisioneve bazohet në rregulloret përkatëse, te cilat, për komisionet apo grupet e punës me karakter të përhershëm, miratohen nga Këshilli Kombëtar.

PJESA E TRETE

Financat

Neni 46

Buxheti

Urdhri i Farmacistëve ka buxhetin e tij, te cilin e administron në përputhje me rregullat financiare në fuqi. Burimet financiare të Urdhrit të Farmacistëve janë:

1.   Kuotizacionet e anëtarëve.

2.   Tarifat e regjistrimit dhe të dhënies së të drejtës vetjake për ushtrimin e profesionit

3.   Donacionet e ndryshme vendase dhe të huaja dhe të ardhura të tjera të ligjishme.

Të ardhurat që realizon gjatë ushtrimit të veprimtarisë, Urdhri i Farmacistëve i përdor për të përmbushur misionin e tij të caktuar në Ligjin nr.9150, datë 30.10.2003.

Neni 47

Kuotizacionet

Këshilli Kombëtar përcakton kuotizacionin mujor për anëtarët në fund të çdo viti për vitin pasardhës në vartësi të gjëndjes, kërkesave dhe nevojave për të siguruar funksionimin normal të Urdhrit në përputhje me funksionin e tij.

Shlyerja e kuotizacionit është e detyrueshme dhe kushtëzon anëtarësinë në Urdhër. Për mos shlyerjen deri në 6 muaj të kuotizacionit, anëtarit i hiqet e drejta individuale për ushtrimin e profesionit.

Neni 48

Përdorimi i burimeve financiare

Burimet financiare të Urdhrit përdoren për:

a)           Paga, honorare, ndihma në rast fatkeqësie për anëtarët dhe familjet e tyre, shpërblime pune dhe kontributin për sigurimet shoqërore e shëndetësore të punonjësve.

b)           Shpenzimet operative (kancelari, transport, ndërlidhje, energji, uje, dieta, dokumentime fotogtrafike, audio dhe videokaseta etj).

c)           Shpenzimet per organizimin e veprimtarive shkencoro-profesionale e kualifikuese (konferenca, simpoziume, sesione, seminare etj).

d)           Shpenzimet për botime me karakter shkencor dhe informativ për nevoja te anëtarëve të Urdhrit.

e)           Investim e blerje mjetesh,  pajisjesh pune për nevojat e veprimtarisë së Urdhrit.

f)            Shpenzimet për pritje e përcjellje delegacionesh e specialistësh nga organizma  të ndryshme ndërkombëtare dhe vende të huaja.

g)           Shpenzimet për ceremeni të ndryshme përkujtimore për figura të shquara të farmaceutikës sonë dhe të huaj.

Neni 49

Shpërblimet financiare

Mbledhjet dhe veprimtaritë e ndryshme të këshillave të Urdhrit, të Komisioneve si dhe aktivizimi i ekspertëve  për konsulta, hartim projektesh dhe materialesh të rëndësishme, për grupe pune dhe shërbime të tjera në funksion të Urdhrit të  Farmacistëve të Shqiperisë shpërblehen sipas tarifave të miratuara nga Këshilli Kombëtar.

KREU I KATËRT

Dispozita Përfundimtare

Neni 50

Emërtimi

Emri i organizmit është “ URDHRI I FARMACISTËVE TE SHQIPËRISE”.

Neni 51

Stema dhe vula

Urdhri i Farmacistëve të Shqipërise ka stemën dhe vulën e tij (Këshilli Kombëtar dhe Këshillat Rajonale)

Neni 52

Rezidenca

Rezidenca e Këshillit Kombëtar është në Tiranë.

Neni 53

Llogaria bankare

UFSH-ja mban llogari bankare në lek dhe valutë të huaj.

Neni 54

Organi Periodik

UFSH-ja boton organin e tij periodik: “FARMACISTI“.